कोण - कोणासाठी

कुणाच्या इतक्याही जवळ जाऊ नये
कि आपल्याला त्याची सवय व्हावी
तडकलेच हृदय जर कधी
जोडतांना असह्य यातना व्हावी

डायरीत कुणाचे नाव इतकेही येऊ नये
कि पानांना ते जड व्हावे
एक दिवस अचानक त्या नावाचे
डायरीत येणे बंद व्हावे

स्वप्नात कुणाला असंही बघू नये
कि आधाराला त्याचे हात असावे
तुटलेच जर स्वप्न अचानक
हातात आपल्या काहीच नसावे

कुणाला इतकाही वेळ देऊ नये
कि आपल्या क्षणाक्षणावर त्याचा अधिकार व्हावा
एक दिवस आरशासमोर आपणास
आपलाच चेहरा परका व्हावा

कुणाची इतकीही ओढ नसावी कि पदोपदी
आपण त्याचीच वाट पहावी
त्याची वाट बघता बघता
आपलीच वाट दिशाहीन व्हावी

कुणाचे इतकेही ऐकू नये कि
कानात त्याच्याच शब्दाचा घुमजाव व्हावा
आपल्या ओठातूनही मग
त्याच्याच शब्दांचा उच्चार व्हावा

कुणाची इतकीही सोबत असू नये
कि प्रत्येक स्पंदनात ती जाणवावी
ती साथ गमवण्याच्या केवळ भीतीने
डोळ्यात खळकन अश्रू जमावी

कुणाला इतकही माझं म्हणू नये
कि त्याचे 'मी' पण आपण विसरून जावे
त्या संभ्रमातून त्याने आपल्याला
ठेच देऊन जागे करावे

पण , पण ..............
कुणाच्या इतक्याही दूर जाऊ नये
कि आपल्या सावली शिवाय
सोबत काहीच नसावे ..........!!!