आठवणी

कॅण्टीन मधला चहा आणि
चहा सोबत वडा पाव
पैसे कुठले खिशात तेव्हा
उधारीचच खात राव ...!

कट्ट्यावर बसणं लेक्चर चुकवून
आणि पोरींची चेष्टा करणं
दिसलीच एखादी चांगली तर
तिला लांबूनच बघून झुरणं ....!

बसलोच चुकून लेक्चरला तर
शेवटचा बाक  ठरलेला
कुणाच्या तरी वहीतलं पान
आणि पेन सुद्धा चोरलेला ...!

परीक्षा जवळ आली कि
मात्र रात्री जागायच्या
डोळ्यात स्वप्न उदयाची म्हणून
झोपही शहाण्या सारख्या वागायच्या....!

पूर्ण व्हायचं एक वर्तुळ
एक वर्ष सरायचं
पुन्हा नव्या पाखरान सोबत
जून झाड भरायचं ....!

अशी वर्तुळ भरता भरता
कळलं अरे कागदच भरला
वर्तुळ झाल्या कागदाला
फक्त सलाम करायचा उरला ....!

पुन्हा नवीन रस्ता
पुन्हा नवीन साठी
जुन्या रस्त्याच्या प्रवासाच्या
फक्त आठवणीच हाती .....!